Bata pa lang ay namulat na si Saru sa mala-impyernong buhay, maagang nagbanat ng buto upang suportahan ang kanyang lasenggong ama. Nang tumawag ang kanyang ina at sinabing patay na ang kambal niya na si Sari dahil sa suicide, dali-daling umuwi siya sa kanilang probinsya. Sa kanyang pagdating, natuklasan ni Saru ang isang misteryosong asul na kwaderno sa kwarto ni Sari na may nakasulat na salitang “Kahimanawari” o kahit man lang kung maaari, naglalaman ito ng mga lihim na kahilingan ng kanyang kapatid.
Nang magpunta siya ng Maynila upang ipaalam sa unibersidad ang pagpanaw ni Sari, nakilala niya si Taisei na nagsasabing biktima si Sari ng “Suicide Virus” isang kasong inaalam ni Sari bago mamatay. Nagpasya si Saru na hiramin ang katauhan ng kambal upang tuklasin ang katotohanan. Dala rin ng pagnanais na matupad ang mga kahilingan ni Sari sa asul na kwaderno, susuungin ni Saru ang misteryong nababalot sa kahimanawari.
Pero paano kung mali pala ang pag-aakala niya kay Sari? "